cp-webdeskചിയാൻ വിക്രം ആരാധകരും തെന്നിന്ത്യൻ സിനിമാലോകവും ഒരുപോലെ കാത്തിരിക്കുന്ന ഗൗതം വാസുദേവ് മേനോൻ ചിത്രം ‘ധ്രുവ നച്ചത്തിരം’ (Dhruva Natchathiram) തിയേറ്ററുകളിലെത്താൻ വീണ്ടും സമയമെടുക്കും. മുൻപ് കോടതി നിശ്ചയിച്ച സമയപരിധിക്കുള്ളിൽ ചിത്രം റിലീസ് ചെയ്യാൻ സാധിക്കാത്തതിനെ തുടർന്ന്, സമയപരിധി നീട്ടിനൽകണം എന്നാവശ്യപ്പെട്ട് സംവിധായകൻ ഗൗതം മേനോൻ സമർപ്പിച്ച ഹർജിയിൽ മദ്രാസ് ഹൈക്കോടതി അനുകൂല വിധി പുറപ്പെടുവിച്ചു. പുതിയ ഉത്തരവ് പ്രകാരം ജൂലൈ 31-നകം ചിത്രം തിയേറ്ററുകളിൽ റിലീസ് ചെയ്യണം.
9 വർഷത്തെ നിയമപോരാട്ടവും പ്രതിസന്ധികളും ഏകദേശം ഒൻപത് വർഷങ്ങൾക്ക് മുൻപ്, 2017-ലാണ് ഗൗതം മേനോൻ്റെ സംവിധാനത്തിൽ വിക്രം നായകനാകുന്ന ഈ സ്പൈ-ത്രില്ലർ ചിത്രത്തിൻ്റെ ഷൂട്ടിംഗ് ആരംഭിക്കുന്നത്. എന്നാൽ സാമ്പത്തിക പ്രതിസന്ധികളും നിർമ്മാണ പങ്കാളികൾക്കിടയിലെ തർക്കങ്ങളും കാരണം ചിത്രത്തിൻ്റെ റിലീസ് അനിശ്ചിതത്വത്തിലാവുകയായിരുന്നു. തുടർന്ന് സിനിമയുടെ റിലീസ് തടയണമെന്നാവശ്യപ്പെട്ട് ഗൗതം മേനോൻ തന്നെയായിരുന്നു മദ്രാസ് ഹൈക്കോടതിയെ സമീപിച്ചത്.
വർഷങ്ങളായി നീണ്ടുനിന്ന ഈ നിയമപോരാട്ടത്തിനൊടുവിൽ, കടുത്ത നിബന്ധനകളോടെ ചിത്രം റിലീസ് ചെയ്യാൻ കോടതി അടുത്തിടെ അനുമതി നൽകിയിരുന്നു. റിലീസിനായി ഒരു പ്രത്യേക ബാങ്ക് അക്കൗണ്ട് ആരംഭിക്കണമെന്നും, സിനിമയിൽ നിന്ന് ലഭിക്കുന്ന കളക്ഷൻ തുക കൃത്യമായി കടക്കാർക്ക് നൽകി തീർക്കണമെന്നുമായിരുന്നു കോടതിയുടെ പ്രധാന വ്യവസ്ഥ. ആദ്യം ജൂൺ 15-നകം ചിത്രം തിയേറ്ററുകളിലെത്തിക്കാനായിരുന്നു നിർദ്ദേശം.
പ്രതീക്ഷയോടെ ആരാധകർ കോടതി നിശ്ചയിച്ച ജൂൺ 15 എന്ന സമയപരിധിക്കുള്ളിൽ സാങ്കേതിക കാരണങ്ങളാൽ റിലീസ് സാധ്യമാകാതെ വന്നതോടെയാണ് ഗൗതം മേനോൻ വീണ്ടും കോടതിയെ സമീപിച്ചതും ജൂലൈ 31 വരെ സമയം അനുവദിച്ച് കിട്ടിയതും.
ഹാരിസ് ജയരാജ് ഈണമിട്ട ചിത്രത്തിലെ ഗാനങ്ങളും ട്രെയിലറുമെല്ലാം ഇതിനകം തന്നെ സോഷ്യൽ മീഡിയയിൽ തരംഗമാണ്. വിക്രമിനൊപ്പം ഋതു വർമ്മ നായികയായെത്തുന്ന ചിത്രത്തിൽ പാർത്ഥിപൻ, രാധിക ശരത്കുമാർ, സിമ്രാൻ, വിനായകൻ തുടങ്ങിയ വൻ താരനിര അണിനിരക്കുന്നുണ്ട്. നിയമക്കുരുക്കുകളെല്ലാം അഴിഞ്ഞ് ജൂലൈ 31-നകം ‘ധ്രുവ നച്ചത്തിരം’ വെള്ളിത്തിരയിൽ വിസ്മയം തീർക്കുമെന്ന പ്രതീക്ഷയിലാണ് സിനിമ പ്രേമികൾ.
