Cinemapranthan

നിയുക്ത തിരുവനന്തപുരം മേയര്‍ ആര്യ രാജേന്ദ്രന് മോഹൻലാലിന്റെ അഭിനന്ദനം

“നമ്മുക്കെല്ലാം ഇഷ്ടമുള്ള നഗരമാണ് തിരുവനന്തപുരം അതിനെ കൂടുതൽ മനോഹരമാക്കി മാറ്റാനുള്ള സന്ദര്‍ഭമാണിത്” മോഹൻലാൽ ആര്യയെ അനുമോദിച്ചു പറഞ്ഞു

നിയുക്ത തിരുവനന്തപുരം മേയര്‍ ആര്യ രാജേന്ദ്രനെ ഫോണിൽ വിളിച്ച് അഭിനന്ദിച്ച് നടൻ മോഹൻലാൽ. രാജ്യത്തെ ഏറ്റവും പ്രായം കുറഞ്ഞ മേയർ ആര്യ രാജേന്ദ്രന് മോഹൻലാൽ എല്ലാ ആശംസകളും നേര്‍ന്നു.

“നമ്മുക്കെല്ലാം ഇഷ്ടമുള്ള നഗരമാണ് തിരുവനന്തപുരം അതിനെ കൂടുതൽ മനോഹരമാക്കി മാറ്റാനുള്ള സന്ദര്‍ഭമാണിത്”:- ആര്യയെ അനുമോദിച്ചു കൊണ്ട് മോഹൻലാൽ പറഞ്ഞു. മുന്നോട്ടുള്ള യാത്രയിൽ എല്ലാ പിന്തുണയും ആശംസകളും നൽകുന്നതായും അടുത്ത വട്ടം തിരുവനന്തപുരത്ത് വരുമ്പോൾ നേരിൽ കാണാമെന്നും ലാൽ ആര്യയ്ക്ക് ഉറപ്പ് നൽകി. വീടെവിടെ എന്നു ചോദിക്കുന്നവരോട് മുടവൻ മുഗളിലെ മോഹൻ ലാലിൻ്റെ വീടിനോട് ചേര്‍ന്നാണ് തൻ്റെ വീടെന്നാണ് അടയാളമായി പറയാറെന്ന് ആര്യ മോഹൻലാലിനോട് പറഞ്ഞു. നേരത്തെ മുടവൻമുഗളിലെ വീട്ടിലുണ്ടായിരുന്ന അമ്മ ഇപ്പോൾ തനിക്കൊപ്പം തേവരയിലെ വീട്ടിലായതിനാലാണ് തിരുവനന്തപുരത്തേക്കുള്ള തൻ്റെ വരവ് കുറഞ്ഞതെന്ന് സംഭാഷണത്തിനിടെ ലാലും പറഞ്ഞു.

താമസം കൊച്ചിയിലാണെങ്കിലും തിരുവനന്തപുരം മുടവൻമുഗൾ വാര്‍ഡിലെ വോട്ടര്‍ ആണ് മോഹൻലാൽ. ഈ വാർഡിൽ നിന്നാണ് ആര്യ രാജേന്ദ്രൻ കൗണ്‍സിലറായി തെരഞ്ഞെടുക്കപ്പെട്ടത്.

cp-webdesk