cp-webdesk
മലയാള സിനിമയിലെ എക്കാലത്തെയും കരുത്തുറ്റ കഥാപാത്ര നടിമാരിൽ മുൻനിരയിലാണ് മീനയുടെ സ്ഥാനം. ലിയാമ്മയുടെയും കെ.കെ. ജോസഫിന്റെയും മകളായി ജനിച്ച്, 1964-ൽ ജെ. ശശികുമാറിന്റെ ‘കുടുംബിനി’യിലൂടെയാണ് അവർ വെള്ളിത്തിരയിലെത്തുന്നത്. ചിത്രത്തിന്റെ ടൈറ്റിൽ കാർഡിൽ ‘മീന കുമാരി’ എന്ന് കുറിക്കപ്പെട്ട ആ പേര് പിന്നീട് ചുരുങ്ങി മലയാള ചലച്ചിത്ര ചരിത്രത്തിൽ സമാനതകളില്ലാത്ത ഒരു ഇതിഹാസ നാമമായി — ‘മീന’യായി മാറി. ബ്ലാക്ക് ആൻഡ് വൈറ്റ് സിനിമകളുടെ കാലത്ത് സഹോദരിയായും കാമുകിയുടെ തോഴിയായും സ്ക്രീനിൽ തിളങ്ങിയ അവർ, പിന്നീട് മലയാള സിനിമയിലെ ഏറ്റവും ശക്തമായ അമ്മ/അമ്മായിയമ്മ കഥാപാത്രങ്ങളുടെ അനിഷേധ്യമായ മുഖമായി സ്വയം അടയാളപ്പെടുത്തുകയായിരുന്നു.
സത്യൻ, പ്രേം നസീർ, മധു എന്നിവരുടെ സുവർണ്ണ കാലഘട്ടം മുതൽ ജയറാം, മുരളി, ജഗതി ശ്രീകുമാർ, നരേന്ദ്ര പ്രസാദ് തുടങ്ങിയവരുടെ തലമുറ വരെ നാല് പതിറ്റാണ്ടോളം നീണ്ട അഭിനയ സപര്യയായിരുന്നു മീനയുടേത്. നാനൂറിലധികം ചിത്രങ്ങളിൽ വേഷമിട്ട അവർക്ക്, വെറുമൊരു നോട്ടം കൊണ്ടും ശബ്ദത്തിലെ തനതായ ഗാംഭീര്യം കൊണ്ടും ഡയലോഗ് ഡെലിവറിയിലെ കൃത്യത കൊണ്ടും പ്രേക്ഷകരിൽ വികാരങ്ങളുടെ വേലിയേറ്റം സൃഷ്ടിക്കാൻ കഴിഞ്ഞു. ‘മേലേപ്പറമ്പിൽ ആൺവീട്’, ‘മിഥുനം’, ‘വരവേൽപ്പ്’, ‘സ്ത്രീധനം’, ‘പൂക്കാലം വരവായി’, ‘മഴവിൽക്കാവടി’ തുടങ്ങിയ ചിത്രങ്ങളിലെ പ്രകടനം ഇതിന് അടിവരയിടുന്നു. ചെറിയ വേഷങ്ങൾ പോലും തന്റെ സ്വതസിദ്ധമായ ശൈലിയിലൂടെ പ്രേക്ഷകരുടെ മനസ്സിൽ ആഴത്തിൽ പതിപ്പിക്കാൻ കഴിഞ്ഞ അപൂർവ്വം നടിമാരിൽ ഒരാളായിരുന്നു അവർ.
‘മേരി’യിൽ നിന്ന് ‘മീന കുമാരി’യിലേക്കും, അവിടെ നിന്ന് മലയാള സിനിമയുടെ സ്വന്തം ‘മീന’യിലേക്കുമുള്ള ആ വളർച്ച കേവലം ഒരു പേരുമാറ്റം മാത്രമായിരുന്നില്ല; മറിച്ച് പ്രതിഭയുടെ കരുത്തുകൊണ്ട് ഒരു നടി സ്വന്തം സാമ്രാജ്യം വെട്ടിപ്പിടിച്ചതിന്റെ ചരിത്രമായിരുന്നു. ഒരു നോട്ടം കൊണ്ടുപോലും കഥാപാത്രത്തോട് വെറുപ്പോ ഇഷ്ടമോ തോന്നിപ്പിക്കാൻ കഴിഞ്ഞ ആ അഭിനയ വിസ്മയത്തിന്, മലയാള സിനിമാ പ്രേമികളുടെ വലിയൊരു കൂട്ടായ്മയായ ‘സിനിമാപ്രാന്തന്റെ’ ആദരാഞ്ജലികൾ.
