cp-webdeskഹോളിവുഡ് ബ്ലോക്ക്ബസ്റ്റർ ചിത്രമായ ‘ജുറാസിക് പാർക്ക്’ പരമ്പരയിലൂടെ ലോകമെമ്പാടുമുള്ള ദശലക്ഷക്കണക്കിന് സിനിമാപ്രേമികളുടെ പ്രിയങ്കരനായി മാറിയ പ്രശസ്ത നടൻ സാം നീൽ (78) അന്തരിച്ചു. തിങ്കളാഴ്ച സിഡ്നിയിലായിരുന്നു അദ്ദേഹത്തിന്റെ അന്ത്യമെന്ന് കുടുംബം ഔദ്യോഗിക പ്രസ്താവനയിലൂടെ അറിയിച്ചു.
2023-ൽ സ്റ്റേജ് ത്രീ ആൻജിയോ ഇമ്മ്യൂണോബ്ലാസ്റ്റിക് ടി-സെൽ ലിംഫോമ (രക്തത്തിലെ അർബുദം) സ്ഥിരീകരിച്ചതിനെത്തുടർന്ന് താരം ഒരു വർഷത്തോളമായി തീവ്രമായ കീമോതെറാപ്പി ചികിത്സയിലായിരുന്നു. തുടർന്ന് താൻ അർബുദവിമുക്തനായ വിവരം അടുത്തിടെ അദ്ദേഹം വെളിപ്പെടുത്തിയിരുന്നെങ്കിലും, അപ്രതീക്ഷിതമായി എത്തിയ വിയോഗവാർത്ത ഹോളിവുഡ് സിനിമാലോകത്തെയാകെ കണ്ണീരിലാഴ്ത്തിയിരിക്കുകയാണ്.
1947-ൽ വടക്കൻ അയർലൻഡിൽ ജനിച്ച സാം നീൽ പിന്നീട് കുടുംബത്തോടൊപ്പം ന്യൂസിലാൻഡിലേക്ക് കുടിയേറുകയായിരുന്നു. അൻപത് വർഷത്തിലേറെ നീണ്ടുനിന്ന അദ്ദേഹത്തിന്റെ അഭിനയജീവിതത്തിൽ ഏറ്റവും ശ്രദ്ധേയമായത് സ്റ്റീവൻ സ്പീൽബർഗിന്റെ ‘ജുറാസിക് പാർക്ക്’ സിനിമകളിലെ ഡോ. അലൻ ഗ്രാന്റ് എന്ന പാലിയന്റോളജിസ്റ്റ് കഥാപാത്രമായിരുന്നു.
‘ദി പിയാനോ’, ‘ഡെഡ് കാം’, ‘ദി ഹണ്ട് ഫോർ റെഡ് ഒക്ടോബർ’ തുടങ്ങിയ വിഖ്യാത സിനിമകളിലും, ലോകമെമ്പാടും തരംഗമായി മാറിയ ‘പീക്കി ബ്ലൈൻഡേഴ്സ്’ എന്ന ടെലിവിഷൻ പരമ്പരയിലെ ചീഫ് ഇൻസ്പെക്ടർ ചെസ്റ്റർ കാംബെൽ എന്ന വേഷത്തിലൂടെയും അദ്ദേഹം പ്രേക്ഷകരെ വിസ്മയിപ്പിച്ചു. ഹോളിവുഡിന് പകരം വെയ്ക്കാനാകാത്ത വലിയൊരു പ്രതിഭയെയാണ് സാം നീലിന്റെ വിയോഗത്തിലൂടെ നഷ്ടമായിരിക്കുന്നത്.
