cp-webdeskതമിഴ്നാട് നിയമസഭാ തിരഞ്ഞെടുപ്പിൽ അപ്രതീക്ഷിത ഫലങ്ങൾ പുറത്തുവരുന്ന പശ്ചാത്തലത്തിൽ, വോട്ടർമാരുടെ രാഷ്ട്രീയ നിലപാടുകളെ രൂക്ഷമായി വിമർശിച്ചുകൊണ്ട് നടൻ പ്രകാശ് രാജ് രംഗത്തെത്തി. ഇതിഹാസ നേതാവ് കെ. കാമരാജിനെപ്പോലെയുള്ളവർ പരാജയപ്പെട്ട ചരിത്രം ഓർമ്മിപ്പിച്ച താരം, വിശാലമായ അർത്ഥത്തിൽ എം.കെ സ്റ്റാലിനും ഇപ്പോൾ തിരിച്ചടി നേരിട്ടിരിക്കുകയാണെന്ന് കുറിച്ചു. ജനങ്ങൾ രാഷ്ട്രീയ ബോധത്തേക്കാൾ ഉപരിയായി വെറും ആരാധനാ സംസ്കാരത്തിന് പിന്നാലെയാണെന്നാണ് അദ്ദേഹത്തിന്റെ പക്ഷം. വിജയിച്ചവർക്ക് ജനക്ഷേമത്തിനായി പ്രവർത്തിക്കാൻ സാധിക്കട്ടെ എന്ന് ആശംസിക്കാനും അദ്ദേഹം മറന്നില്ല.
വിജയ്യുടെ രാഷ്ട്രീയ നേട്ടത്തെ തമിഴ്നാട് ഒന്നടങ്കം ഏറ്റെടുക്കുമ്പോൾ, പ്രകാശ് രാജിന്റെ ഈ നിശിതമായ നിരീക്ഷണം സോഷ്യൽ മീഡിയയിൽ വലിയ തർക്കങ്ങൾക്കാണ് തിരികൊളുത്തിയിരിക്കുന്നത്. തമിഴ് രാഷ്ട്രീയത്തിലെ താരസ്വാധീനം വീണ്ടും സജീവ ചർച്ചയാക്കാൻ ഈ പ്രതികരണം കാരണമായി. സമൂഹം പൂർണ്ണമായും ആരാധകക്കൂട്ടങ്ങളാൽ നയിക്കപ്പെടുന്ന ഒന്നായി മാറിയെന്നും, ജനങ്ങളിൽ യഥാർത്ഥ രാഷ്ട്രീയ അവബോധം ഇനിയും വളരേണ്ടിയിരിക്കുന്നു എന്നുമുള്ള വസ്തുതയിലേക്കാണ് അദ്ദേഹത്തിന്റെ കുറിപ്പ് വിരൽ ചൂണ്ടുന്നത്.
